Azad Alı oğlu Abbasov 1968-ci ildə Basarkeçərin Zərkənd kəndində dünyaya göz açmışdır. O, kənd məktəbində təhsil aldığı dövrdə, nədənsə “Uzaq sahillərdə filminə baxmaqdan heç vaxt yorulmazdı. Hər dəfə Mehdinin almanlara vurduğu sarsıdıcı zərbələrə baxdıqca “Mixaylo”ya min əhsən deyərdi. Kim bilir, bəlkə elə o vaxtdan ürəyinə dammışdı ki, gələcəkdə o da Mehdi kimi bir qartala çevriləcək, heç vaxt düşmən qabağında büdrəməyəcək, faşistdən qansız olan erməni daşnakları ilə savaşda canını qurban verəcəkdir.
1988-ci ildə göyçəlilər öz ata-baba yurdlarını tərk edəndə ordu sıralarında idi. Ermənilərin birdənbirə azğınlaşması Azadın qəlbini didib parçalayırdı Ordudan tərxis olunduqdan sonra könüllü olaraq cəbhə bölgəsinə yollandı. Çox keçmədən Goranboyun 1-ci batalyonunda Azad cəsur, igid bir döyüşçü kimi tanındı, döyüş əməliyyatlarının yerinə yetirilməsində yaxından iştirak etdi. Hər dəfə erməni dığaları leş-leşə söykənəndə Azadın alovlanan sinəsinə su çilənirdi. Göyçənin bu igid oğlu ölümündən qorxmurdu, ən çətin anda düşməni ürəyindən oxlayırdı. Azad Abbasov keçmiş Şaumyankənd uğrunda gedən ölüm-dirim savaşında rəşadətli döyüş yolu keçdi, hər qarış Vətən torpağı uğrunda qeyrətlə vuruşdu. Tale elə gətirdi ki, 1992-ci il iyulun 1-də Sərsəng su anbarı ətrafında gedən ağır döyüşlərdə Azad qəhrəmancasına həlak oldu. Zirvəsi görünməyən “Çalmalı” dağını, onun sinəsindəki buz və şərbət bulaqları xatırladı, sonra isə gözlərini əbədilik yumdu və fani dünyadan azadlıq aşiqi kimi köçdü.
Həsən OCAQQULİYEV
